Saturday, March 29, 2025
Siro ilumina, desde o Ferrol das Luces, a historia de Galicia e da democracia - A sede de Afundación expón as caricaturas de «40 anos de autonomía» por RAMÓN LOUREIRO in Voz de Galicia
Asede
ferrolá de Afundación, un monumental e luminoso edificio, deseñado a finais do
XVIII e inaugurado a comezos de XIX, que ao longo da súa historia foi desde
sede do Goberno Militar ata instituto de Ensino Secundario —un instituto no que
exerceu a docencia Gonzalo Torrente Ballester—, acolle desde este venres a
mostra 40 anos de autonomía nas caricaturas de Siro, que chega a Ferrol da
man do Parlamento de Galicia, coa colaboración de La Voz de Galicia e de
Afundación, Obra Social Abanca. Unha exposición integrada por 230 viñetas das
publicadas por Siro López en La Voz entre os anos 1985 e 2006. Viñetas, todas elas,
nas que o debuxante ferrolán dirixiu a súa particular mirada, sempre repleta de
humor, aos que, en cada momento, protagonizaron os feitos xeralmente máis
relevantes —e sempre máis transcendentes— da política galega.
A
mostra, decididamente «reveladora» para cantos queiran coñecer en profundidade
a historia recente de Galicia —como ben sinalou o director xerente da
exposición, Pedro Otero Espinar— permanecerá aberta ao público ata o día 21 de
maio, e poderá visitarse de luns a venres en horario de 11 a 14 horas e de 17 a
20 horas, e os sábados de 11 a 14 horas e de 17 a 19 horas.
Unha
merecida homenaxe
Foi
Pedro Otero, tamén, quen, nun acto inaugural repleto de momentos de intensa
emoción, subliñou o carácter de homenaxe a Siro que esta mostra ten na cidade
que viu nacer ao debuxante. Mentres que o comisario da mostra, Aser Álvarez
González, destacaba, pola súa banda, a extraordinaria valía das caricaturas de
Siro, insistindo el mesmo, tamén, na importancia do reencontro do debuxante coa
cidade na que veu ao mundo.
O
delegado de La Voz de Galicia en Ferrol, Andrés Vellón, subliñou na súa
intervención que Siro, ademais de artista, «é xornalista»; e iluminou as súas
palabras cun recordo persoal: a lembranza de cando, sendo el mesmo estudante de
xornalismo en Santiago, o primeiro que facían, el e moitos dos seus
compañeiros, ao abriren as páxinas do periódico, era buscar o debuxo de Siro;
un debuxo que sen necesidade de palabras algunha explicaba, á perfección, que
momento estaban a vivir a autonomía galega... e os que estaban á fronte dela.
Hoxe,
cando o xornalismo se enfronta a momentos moi complexos, hai que valorar máis
que nunca, veu dicir Vellón, o talento de Siro para contar sempre moito... e
para contalo ben.
«Hoxe
aquí, con esta mostra, pechamos un ciclo...»
«Esta
exposición é unha oportunidade única para celebrar o talento de Siro e para
reflexionar sobre a nosa historia política recente», dixo o alcalde de Ferrol,
Xosé Manuel Rey Varela, ante os centos de persoas que acudiron a inauguración
da mostra. Persoas entre as que estaban representantes dos máis diversos
ámbitos da vida cultural, política e académica de Galicia. «É unha homenaxe
—engadiu o rexedor ferrolán— á intelixencia, ao humor e á arte dun mestre que
soubo retratar a esencia de Galicia cunha mestría inigualable».
«Nesta
mostra —apuntou Rey Varela— as caricaturas de Siro eríxense como un testemuño
gráfico imprescindible, que exhibe a xenialidade do artista».
Moi
emotivas foron, tamén, as palabras do presidente do Parlamento, Miguel Ángel
Santalices, que ademais quixo poñer el mesmo unha nota de humor —ou máis de
unha— a través do seu discurso, invitando ao propio Siro a reflexionar sobre o
que poida haber de certo, ou non, no tópico que afirma que os galegos non temos
graza. O feito de que Siro decidise, coa maior das xenerosidades, doar ao
Parlamento as súas caricaturas, dixo Santalices, é algo que Galicia debe saber
valorar na súa xusta dimensión.
E
especialmente conmovedora foi, durante o acto inaugural a mostra, a
intervención do propio Siro. O debuxante lembrou con inmensa gratitude a
Santiago Rey Fernández-Latorre, presidente e editor de La Voz de Galicia, que
foi quen o convidou a incorporarse á Redacción do periódico.
Nunca
se arrepentiu Siro, como el mesmo lembrou, de deixar atrás o seu traballo na
antiga Bazán para exercer (caricatura, radio, artigos...) o xornalismo. «Hoxe
aquí, en Ferrol —dixo Siro—, con esta mostra, pechamos un ciclo...». E a xente,
emocionada, non paraba de aplaudir.
